الأدوات العملية للمؤسس!
يا هلا بيك يا الـ “مؤسس/ ـة” الرهيب/ ـة 🏴☠️
في البداية لازم نوضح حاجة مهمة
هذا المقال عملي وغير مُتكلف، والهدف منه تنفيذ أشياء معينة وليس تعليمي، فخلينا نبدأ ونكون عمليين.
من تجاربي الشخصية في بناء الشركات الناشئة مع خلفيتي التقنية، واجهت تحدي حقيقي ومزعج. إيش هوا موضوع حقوق الملكية (equity)، التقييم (valuation)، وغيرها من المصطلحات والمفاهيم المالية الغريبة؟! كل إللي كنت أبغاه هو إني أبني شي معين، واكسب منه قرشين حلوة وكثير، وبعدها أأمن مستقبل أهلي وأنا عالبحر. لكن الموضوع ما كان سهل وكان جداً معقد بالنسبة ليا.
عشان كذا، قررت اليوم أشارك معاكم كل معرفتي في هذه المواضيع وبطريقة عملية بحتة، بعد ما اتعلمت وقريت وغلطت وطبقت، انبسطوا 😁
في هذا الجزء الأول -1 من 2- حابب أشارك معاكم الأدوات إللي متأكد إن كل واحد يبغى يعملها لكن ما عنده وقت أو ما يعرف، عشان كذا بنيتها بأبسط وأسهل طريقة ممكنة وبدون تعقيدات. وبكذا ما راح يكون عندك عذر بعد اليوم ما تعمل المطلوب وتقسم النسب بين المؤسسين وكمان تقييم شركتك بطريقة صح وغيرها!
بعد ما تكون عندك الفكرة الرهيبة (idea)، تبغى تحولها لعمل تجاري (Business) عشان تصير غني (هذا أبسط تعريف للشركة الناشئة / Startup). المشكلة تكون في حاجتك لناس يكونوا معاك (شركاء مؤسسون، فريق، ويمكن مستشارين) وكمان في حاجتك للـ “فلوس” عشان تبدأ أو تكمل طريقك (التمويل)، وقتها راح تجيك هذه الأسئلة: إيش راح يكون المقابل لهم؟ وكم؟ ومتى راح تعطيهم هذا “المقابل”؟ بالنسبة للسبب، فهو بسيط، لأنهم بيساعدوك!
عشان كذا بنيت هذه المجموعة من الأدوات إللي راح تساعدك تجاوب على هذه الأسئلة، وعلى غيرها كمان. نبدأ ونتوكل على الله، بس المهم خليك فاكر، “التمرين” هذا جدي وصعب وغير مناسب للقلوب الضعيفة! لكنه ضروري جداً لمستقبل شركتك/مستقبلك انت كمان. استعين بالله وخليك قدها وافصل “الريوس” من الآن!
إيش موجود في أدوات المؤسس العملية؟
1. الصفحة الرئيسية
اعتبر هذه الورقة هيا الخريطة تبع الأدوات، فيها شوية إرشادات وكمان تساعدك تتنقل بين الصفحات الداخلية/الأدوات.
2. مُقسِم نسبة حقوق الملكية
هذا القسم فيه ورقتين/صفحتين/2 sheets.
الورقة الأولى (🧮 1. إعداد نسبة حقوق الملكية)
12 طريقة حسابية عشان توزع وتقسم الأسهم بينك وبين شركائك المؤسسين! صحيح إنهم كثير، لكن ضروري تحسب بأكثر من طريقة وتعرف طريقة شركائك إللي ارتاحوا معاها، ورأيهم، وتفكيرهم كمان، لأن هذا الموضوع دائماً يسوي مشاكل لو ما كان معمول بطريقة صحيحة ومقنعة جداً للجميع. اقترح عليكم تعملوها بشكل فردي أول، وبعدها اجتمعوا واعملوها سوا وشوفوا الإختلافات وناقشوها وصفوا النفوس من اليوم مع بعض، أحسن ما يكون نقاشكم في المحكمة -لا سمح الله-.
شركاء مؤسسين في شركة ناشئة يعني بطريقة أو بأخرى، مشابه للزواج! الموضوع بكل بساطة علاقة طويلة الأجل وتحتاج “تشمير” وشغل وصدق في كل شيء و عناية شديدة بطفلكم “الشركة الناشئة” طول الوقت، 24 ساعة في اليوم و 7 أيام في الأسبوع، و 365 يوم في السنة. غير كذا، الخيارات والطرق الكثير تطمنكم وتعطيكم راحة بال، لأن كل شي موثق بطريقة عملية ومعاها رشة “علم”.
في أرض الواقع، مافي صح أو خطأ في عالم الشركات الناشئة، وكل شيء قابل للتحدي والتفاوض. المهم إنكم تبعدوا عن نسبة 50/50 وكمان عن خمسة مؤسسين أو أكثر، هذه الحاجتين أبداً مو في صالحكم اليوم وفي المستقبل.
الورقة الثانية (📕 2. ملخص نسبة حقوق الملكية)
ملخص سريع لنتائج كل الطرق المستخدمة في توزيع حقوق الملكية. هنا، لازم تاخذ قرار نهائي لا يسمح بإعادة التفاوض فيه وتحدد النسبة النهائية من ملكية الشركة لكل شريك مؤسس. عشان الكل يكون مرتاح ومقتنع بالنتيجة ويحس إن مساهمته في نجاح هذا الحلم مُقدرة ومأخوذة بعين الإعتبار وكمان تعتبر نسبة عادلة.
خليك فاكر
لازم تكون مُنصف وعقلاني ولا تكون جشع أبداً. الشركاء المؤسسين بيشاركوك حلمك ويساعدوك توصل لرؤيتك، إنصافك لهم من أول يوم، راح يعزز “ثقافة” صحية في شركتك ويحمس كل الفريق إنه يعطي أكثر لأنه راح يكون متأكد إن هذا الشي راح يكون مُقدر. وبالمناسبة موضوع إنك توزع من نسبة الملكية حسب الظروف، ممكن راح توديك في داهية!
3. مُقيِم الأعمال
هذا القسم فيه ورقتين/صفحتين/2 sheets.
الورقة الأولى (💰 3. طرق التقييم)
14 طريقة حسابية مبسطة عشان تقييم شركتك الناشئة، وتعرف قيمتها الحقيقية. صحيح إنهم كثير، لكن ضروري تشوف التقييم من أكثر من زاوية وتتعلم المفاهيم الموجودة فيه لمصلحة شركتك الناشئة. فنصيحة، اعمل كل الطرق، حتى لو ما كنت راح تعتمد ولا نتيجة منهم. في النهاية تقييم شركتك الناشئة في مراحلها الأولية جداً (ما قبل البذرة أو البذرة / Pre-seed or Seed) يعتمد كثير على أشياء غير الأرقام، يعتمد عليك وعلى فريقك والموضوع مراهنة على أحلام، لا أكثر ولا أقل. لكن لو عملت الطرق هذه راح تعرف تتفاوض بشكل أفضل مع المستثمرين، وراح تقنع عدد أكبر ينضم لفريقك. غير كذا، الخيارات والطرق الكثير تطمنك وتعطيك راحة بال، لأن كل شي موثق بطريقة عملية ومعاها رشة “علم”.
في أرض الواقع، مافي صح أو خطأ في عالم الشركات الناشئة، وخصوصاً في التقييم، وكل شيء قابل للتحدي والتفاوض. المهم إنكم تبعد عن تقييم مرتفع جداً بدون تبرير قوي وأساس صحيح.
الورقة الثانية (📗 4. ملخص التقييم)
ملخص سريع لنتائج كل الطرق المستخدمة في تقييم شركتك الناشئة. هنا، لازم تاخذ قرار نهائي وتكون قده يا وحش! وتحدد التقييم النهائي لشركتك الناشئة إللي راح تدافع عنه بمنطق وبعقلانية. لكن، خليك مستعد تنزل في التقييم لو حصلت رفض من جميع المستثمرين! أو تتمسك بتقييمك وتشيل “العواقب” على ظهرك.
خليك فاكر
التقييم المرتفع والتقييم المنخفض كلهم سيئين لشركتك. التقييم المعقول يعطيك إنت وفريقك ثقة في التفاوض. وبالمناسبة، التقييم فن حتى مع أكبر الشركات المدرجة في أكبر أسواق العالم، انت شركة في الغالب ما عندك أصول “ملموسة” اليوم، فالطرق التقليدية ما تنفع من الأساس.
4. مُحاكي جدول رأس المال
هذا القسم فيه ورقتين/صفحتين/2 sheets.
الورقة الأولى (📑 5. محاكاة جدول رأس المال)
محاكاة لأول جولتين أساسية (بينكم كشركاء مؤسسين وبعدها خطة موظفينكم ومستشارينكم) وبعدها محاكاة لسيناريوهات 6 جولات استثمارية متتالية. عشان تفهم وتشوف كيف إن الوقت راح يزيد من قيمة أسهمكم (shares value)، ويخلي عدد أسهمكم زي ما هو (number of shares)، ويقلل ويخفف من نسبة ملكيتكم الغالية في الشركة (equity) بعد كل جولة إستثمارية. عشان كذا في رأي -أنا أأيده – “أخــِّـــر دخول المستثمرين قد ما تقدر، ولو في طريقة تقدر تاخذ فيها فلوس/منح مالية/أو غيره بدون ما تعطي نسبة في المقابل روح معاها، بعد ما تستخير” (Bootstrapping).
إنك تعمل المحاكاة لكل الجوالات الموجودة، وتشوف قيمة حلمك بعد سنوات، هذا الشي راح يكون أكبر دافع إنك “تصمل” وتقنع فريقك يكمل معاك عشان تقطفوا نتيجة صبركم وتحملكم ومغامرتكم (venture). ببساطة راح تشوفوا قيمة “الفلوس” إللي تساوي أسهمكم وقت التخارج (صح، في الشركات الناشئة، ما تقدر تتخارج وتاخذ كاش في أي وقت حتى لو كنت مستثمر، لازم تنتظر “حدث تخارج”). غير كذا، راح تكون مستعد للمستثمرين وأسئلتهم وتوقعاتهم (تقدر تبني معاهم هذا الجدول بالمناسبة!)، مثل أبسط الأسئلة، كم راح تكون قيمة الجولة الجية؟ هذا السؤال لحاله راح يبين للمستثمر عائد الإستثمار وقيمة تنمية إستثماره (ROI).
أخيراً، جدول رأس المال (Cap Table)، هو الجدول إللي توثق فيه كل أسماء الـمـُــلاك (أفراد أو جهات) ونسب ملكيتهم وعدد أسهمهم وكمان نوعها.
الورقة الثانية (📘 6. ملخص التخارج)
ملخص سريع لنتائج كل الجولات من المحاكي. عشان تشوف “الصورة” النهائية لشكل جدول راس المال والملاك المساهمين. هنا راح تشوف كيف إن حلم صغير يتحول لـ “بيزنس” ضخم للجميع والكل مراهن عليه واستثمر فيه.
خليك فاكر
لازم تعرف كم المبلغ إللي راح تجمعه في الجولة الحالية والجولة إللي بعدها عالآقل. وبالمناسبة، لا تجمع فوق قدرتك أو حاجتك، في شركات مشكلتها إنه عندها مبالغ أكثر من حاجتها ومجلس الإدارة بيجروا وراهم على هذه المبالغ، لأن الهدف الأساسي، تعظيم قيمة رأس مال المساهمين والمستثمرين، مش جمع أكبر قيمة “كاش”.
5. تخصيص الأسهم
هذا القسم فيه ورقتين/صفحتين/2 sheets.
الورقة الأولى (🚩 7. خطة تخصيص أسهم المؤسسين)
جدول الإستحقاق (vesting table) الخاص للمؤسسين، هذا الجدول جداً مهم، ويساعد لحالات كثير زي إن في شريك مؤسس خرج قبل الوقت إللي اتفقتوا عليه أو شريك مؤسس يبغى يعرف عدد أسهمه اليوم (صح، في الشركات الناشئة، الأسهم تتخصص لك، وبعد شروط معينة/فترة معينة تتملكها ولك حق التصرف فيها، مش من أول يوم تتملكها!!) وهنا يجي دور أهمية فترة “الاستحقاق / vesting” والمفاجأة الكبيرة، فترة الحجر أو الـجُـرف / Cliff.
مثال سريع: انت بتاريخ 1/1/2024، تمتلك في شركة ناشئة نسبة 30٪ ولك 300,000 سهم على فترة إستحقاق 3 سنوات مع سنة جُـرف. هذا الكلام معناه: انت (مخصص) لك 300 ألف سهم، ولازم تكمل مع الشركة سنة كاملة أول شي عشان تبدأ تستحق الأسهم المخصصة لك، بعدها وبشكل شهري (أو ربع سنوي، حسب وحدة فترة الإستحقاق المتبعة) تبدأ تتملك جزء من الأسهم المخصصة لك، يعني لو مشيت من الشركة بنهاية تاريخ 30/12/2026 (بعد ثلاث سنوات)، راح تكون مالك لعدد 200,000 سهم ونسبة 20٪ والباقية (عدد 100,000 سهم ونسبة 10٪) راح ترجع للشركة. أما لو مشيت من الشركة بنهاية تاريخ 30/12/2028 (بعد خمسة سنوات)، راح تكون مالك لعدد 300,000 سهم ونسبة 30٪ ويمكن تاخذ أسهم زيادة كـ علاوة / بونس، لأنك جلست سنة زيادة!
الورقة الثانية (🎁 8. خطة تخصيص أسهم التعويضات)
جدول إستحقاق ثاني، خاص للرهيبين إللي يساعدوك من موظفين ومستشارين، متعارف عليه باسم “خطة خيارات أسهم الموظفين (ESOP)” ومدموج معاه خطة أسهم المستشارين (ASP). كلمة خطة هنا، إن الأشخاص يكون لهم الخيار بشراء السهم أو الحصول عليها بطريقة خاصة وكمان لأن الصندوق الخاص لهم له نسبة معينة يمثله عدد أسهم معين، وهذا الجدول يوثق الأشخاص إللي راح تكون لهم هذه الأسهم. وغير كذا، بعكس المؤسسين والمستثمرين، في الغالب مافي نسبة ملكية، بس أسهم، وهذه الأسهم تعبر عن نسبة الملكية!! الموضوع ممكن يكون متداخل شوية لكن بسيط في النهاية.
كمؤسس، تحتاج فريق رهيب يكون معاك ويعطيك 200٪ من جهده عشان توصلوا جميعاً، لكن لأنك ما تقدر تعطيهم راتب يوازي متوسط السوق أو المبلغ إللي يستاهلوه، راح تقنعهم وتعطيهم أسهم في شركتك، مش نسبة! هنا حتجي الأسئلة إللي بدأنا بيها، كم راح تعطيهم؟ ومتى؟ وكيف؟
الجدول نفسه راح يساعدك توثق أسماء إللي عندهم أسهم، و كمان في أداة صغيرة راح تقلك كم ممكن تعطيهم كعدد أسهم بناءً على معايير معينة وموحدة (الشفافية والعدل مهمين)، وتعريف فترة الإستحقاق راح يخليك تعرف متى، وأنواع الأسهم موجودة كمان عشان تعرف إيش نوع الأسهم لكل واحد (نعم، راح يكون في إختلاف في العدد وفترة الإستحقاق والنوع لكل شخص). أخر شي يبقى عليك، تعرف قيمة هذه الأسهم “اليوم” وبعد عدة سنوات، عشان تساعدك في إقناعهم يدخلوا معاك براتب أقل من رواتب السوق.
خليك فاكر
تخصيص الأسهم (allocating shares) مهم، وتملك الأسهم (vested shares) حاجة مختلفة، وفترة إستحقاق الأسهم (vesting) ضرورية عشان تضمن يكونوا معاك. وأخيراً “تَـصرف” الموظف في اسهمه (Exercised shares) حق مشروع ولازم تشجع عليه، عشان تثبت إن الموضوع مُجدي ومش بس كلام وأرقام على ورق.
6. القاموس
ورقة (📖 9. معجم المصطلحات)
قائمة بمصطلحات موجودة في عالم ريادة الأعمال للشركات الناشئة، وكمان موجودة في (أدوات المؤسس العملية)، باللغتين العربية والإنجليزية. على الأقل خذ لك نظرة سريعة عليها.
كيف تستخدم أدوات المؤسس العملية؟
حاولت قد ما أقدر أبسط أشياء كثيرة ومفاهيم معقدة وما تعتبر من إختصاصي (أنا أساساً خريج هندسة برمجيات مو هندسة مالية 😅)، على العموم، حاول تمشي مع هذه الخطوات (بالترتيب) عشان أقدر أضمن لك أفضل نتيجة:
- اعمل نسخة من الملف
- شغل مود “ابن بطوطة” الموجود بداخلك واتصفح كل الورقة و (أقرأ) -الله يسعدك أقرى- قبل ما تبدأ فيها، روح يمين ويسار وفوق تحت وشوف كل الورقة أول.
- عدل بس “الخلايا” إللي باللون الأصفر.
- خلي “الخلايا” البرتقالية زي ما هي، عدّلها لو كان ضروري.
- كل الأشياء مربوطة مع بعض، عشان كذا أفضل لك إنك تمشي بالترتيب تبع الصفحات.
- حصلت خطأ؟ (رَحِمَ الله امرَأً أهدى إلي عيوبي)، ضيف تعليق على مكان الخطأ وراح أراجعه وأصلحه في أسرع وقت.
- عندك ملاحظة أو طلب أو تعليق، أشكرك مسبقاً وأتمنى تشاركني هو.
خلاص، أتأخر الوقت!
الوقت أتأخر، ووراكم شركة تحتاجكم وعملاء يستنوكم وشغل يبغى ينتهي، خلونا نختم هنا اليوم.
اسمعني/اسمعيني كويس، الموضوع صعب وهذا الشي حقيقي. راح تبكي، تضحك، تكتئب، وتحتفل، وتتصور، وتخاف لوحدك. لكن في النهاية لازم تكمل طريق الرحلة إللي بدأتها. وقاعدة أساسية أنا مؤمن بيها، “عشان تنجح مش المفروض تتبع آراء أو خطط أو كُتب أي شخص، ركز واتعلم والمهم انك تتحرك بسرعة”
هذا المقال هو الجزء الأول من اثنين، لرد الجميل لمجتمع ريادة الأعمال وزكاة عن كل ما اتعلمته، وربنا يتقبل.
لازم تعمل هذا التمرين، على الأقل عشان تعرف جديتك في دخول هذا العالم “المظلم” (ترى أبداً ماهو عالم وردي كما يشاع، لكن هو عالم رهيب ياخي!!)، والمفروض ما راح ياخذ منك أكثر من يومين إلى ثلاثة أيام.
مراجعة مختصرة
أولاً، شكراً إنك قرأت أول مقالة ليا ووصلت لهنا وأعطيتني هذا الوقت.
ثانياً، مع هذه الأدوات راح تبدأ إنك تقسم ملكية شركتك الرهيبة بين الشركاء المؤسسين، وبعدها حتقييم قد إيش تسوى شركتك، وبعدها حتشوف كيف إن دخول المستثمرين راح يأثر على شركتك، وأخيراً راح تنتهي إنك تعرف كيف تخصص وتعطي أسهم للكل من شركاء مؤسسين وموظفين ومستشارين. في النهاية هذا تمرين مهم، لكن يظل تمرين غير رسمي، عشان كذا تحتاج توثق كل شي رسمياً بعد كل خطوة، وانصح إنك تستخدم أدوات معروفة للموضوع هذا، زي
- VeFund – https://www.vefund.io
- RasMal – https://rasmal.io
- Clara – https://clara.co
- Cake – https://www.cakeequity.com
- Salto X – https://www.saltox.co
- Equidam – https://www.equidam.com
- Carta – https://carta.com
وأخيرًا، اتفضل …
ملاحظة جانبية: الملف آمن بنسبة 100%، لكن بعض روابط المراجع الموجودة في الورقة رقم 2 (Equity Setup) شغلت حماية جوجل بشكل ألي!!
~ اتوكل على الله، خليك قوي، لا تستسلم، واتحرك
عبدالرحمن جامي
بالمناسبة، ما راح أقول لا لكوب قهوة ببلاش 😋
اترك تعليقاً